“الصورة ضحكت عليكي ” قصيدة للشاعر فتحي نجم

الصورة ضحكت عليكي
شوفتي في وشى
بسمة خالية م الشرود
ومن الحدود الديقّة
عرفت تعدي وتترسم
تخدع عنيكي
الصورة ضحكت عليكي
وانا المهيأ للوجيعة والانهيار
ما اقدرتش اخفي محنتي
فلتسمحيلي بنظرة تانية
يمكن تعيدي الاختيار
لحظة لوقاكي
دمعة عنيا الضيقين
رفضت تقابلك بالبكا
لحظة لوقاكي
صوتي المعاند جوا مني
ماعرفشى ليه اصبح جميل
ونسيت للحظة الدربكة
ونسيت انيني
غمضت عيني
كنتي العروسة المدهشة
وحلمت انى بحضنك
وحلمت اني بنفعل
لما تمدّي ايديكي ليا
وتلمسيني والمسك
وحلمت اني بونسّك
واستنقي نكتة
تضحّكيني واضحّكك
ما عرفشى ليه صدقت نفسى
رغم انقطاعي عن عيون الناس رأيتك
حاجة تانية ملفتة
انتي الوحيدة ضحكت ليكي
وعليكي انك تعرفي
الصورة ضحكت عليكي….
والبسمة كانت
ومضة خافتة ف كون وسيع
انتي اللي تريااق صيدلي
وانا اللي موصوف للجميع
راكب حصان اعرج مالوش
ادني صفة..
حفظتنى كل الارصفة
وما بين رصفيك والامان
مشهد ..ما يتكررشى تاني
مجاني فيكي الابتسامة
وفيّا تسوى الف شيئ
والصورة ضحكت عليكى
ما تصاحبنيش