” هيباتيا ” قصيدة للشاعر ” أحمد الشريف “

انا عندي 100 مليون وجع
متشعلقين في الرف مش فوقه
وبنت سمراء وباخرة و صاحب جدع
متخبيين وسط الكتب لسنين
مين اللي قال مكتبتي ما بتسترش؟
حروفي سترت ياما بني ادمين
ما عرفتش أوهب جتتي للسماء
ما قدرتش امنع رعشتي ع الارض
اول سطور المعرفه كانت وبا
اول شعور في الوحده كان البرد
…
الضباب بيغمي عين الشمس
قلبي فاق و اعلن الثورة
بدا بترسيم الحدود حواليه
نادي في جيوش الضي تتخبى
وتسيبني اكمل في الطريق حبه
انسىخ هيباتيا جديده من ضلعي
كل البشر تصبح لنا مماليك
الاسود طافح على الابيض
بمجرد ما لمحت هيباتيا
فضيت كوبايتي انا م الالوان
ما انا شبت صبرا قبل ما ابقى شباب
فطبيعي لما الفرحه تيجي هشب
وارسم شبابي كيف ما كنت باحب
بالعدل لازم تتبع شرعي
اخذ النفس فتطلعه هي
تسبق عيونها مشاعري العنوان
تحبل كفوفها بورد متحني
تزرع عيدانه في المسام بالليل
يطلع عليه الصبح بيغني
تغير فروع الدنيا من فرعى
كان مستحيل انا ابقى شايف مستحيل
اليأس لعبه تعلم نوح والعويل
وانا جندي عاش العمر مستني
هرسم زمن ثابت بنيه التحنيط
هرسم ربيع عيل يكبر ولا اكبرشي
طريقي لو يتعدل والله مش همشي
مش كل بلياتشو ضحكنا ما ضحكشي
اعرف رصيف إتهد م الوحده
اعرف صور كان ضلها رمشي
ماسك قلم قد اعلن العصيان
مشيت طريق خلصني ما خلصشي
أهي شمسي فتحت عينها بعد غياب
دبلت هيباتيا قبل ما تفتح
و اهي دي النهاية لكل حدوته
اصعب ألم كان هو عصيان القلم
رافض يبدل دمعة م النوته
هاستنى برضوا الشمس تتدارى
مش كل ورده بتنتشي بالضي
وانا برضوا رافض رمية الفوطه
تابلوه و فارده يستحيل على الطي
كم ثورة فيا بس مكبوته