” هنا يسكن شهيد ” قصيدة للشاعر والكاتب ” جمال حراجي “

زفة مواكب من بلاد الله
…… لله
من الشجر اللي طارح مواجع
من البحر اللي ساكن جواه
زفة من بلاد اللة…….. لله
فى الأصل كانت ارض بور
طرحت جناين
وعليت سور ورا سور
حجبت عيون اللي زرعوا
وقامت مكانها قبور
رايحة تلم الجرح وتجبر المكسور
لا أبوزيد غزا ولا الزناتى طلع منصور
وكانت ارض بور
فجأة لم الشجر عصافير
أتحزموا بالنور
وجريوا يمه البحر اللي كان ساحل
وساحر وكان مسحور
ماشربوش من ميتة رجعوا عطاشا
تلمهم عصا ودقون
البحر كان غاية للي سباه الموج
وكان غنوه ساعة الرحيل وشبكة صيد
وتكبيرة فى ليلة عيد
البحر عمرة ما كان مجنون ؟
كان بيوسع لما الحياة بتضييق
ويسمع لك ومايملش غناك
ويقولك فداك
الصبر مفتاحه تحت صخرة هناك
وشجرة بتطرح كل يوم فى هواك
ولاد وبنات يحملوا الفكرة
ويطيروا ع الشجر عصافير
يوزعوا البسمة على القاضي وع السجان
ويحلموا بالزحمة فى الطوابير
ولما الليالي تفيض
يحرتوها أرض وشجر
ويعلوا فى الأساطير
تنور العواميد “والساري” ضل عنيد
وتشرب الأرض الحكاوي
وكأنة ماعداش عليها العيد
مجرد رخامة “هنا يسكن شهيد ”