” جرح قديم ” قصيدة للشاعر ” جمال حراجي “

قلبك( بنفسج بيبهج وأنت زهر حزين )
وتاريخك بيليق بالدنيا الفانية
وبحزن النايمين فى جروحك
من أيام العتمة الاولى
أيدك مطلوقة زى لسانك
بتعبى يوماتى فى صدرك
أحلام الخوف من بكرة
اهو جالك يوم
تتصدر فية المشهد
وتعلن كل مواهبك
قدام لجنة تحكيم وهمية
عارفة كويس
انك متورط
فى جرايم سابقة؟
خد بالك .. المشهد “لحظة ”
والوقت بيجرى بسرعة
لو راح تنفد من أول عتبة
تلاقى الدنيا وراك
بتعديك بمراحل ……..
وما عدش عندك فرصة
سلم نفسك .. كلك
وأستناهم عند أول ناصية
مدفون جواها حاجة
كنت بتسميها زمان “جرح قديم”