” علي عليوة ” قصيدة للشاعر الراحل ” محمد ندا “

علي عليوه اتهبل
دق الهوا في الهون
شد الرحال ع الجبل
قالوا عليه مجنون
حكموا عليه بالخبل
وجنون عليوه فنون

علي عليوه جمع
كل السعف والقش
وشاف له إمة جبل
وراح بنى كام عش

ملا العشوش بالهوا
والحلم بيراوده
م الفكر ياما انكوى
وخياله بيهاوده

علي عليوه شرق
الناس جابت سيرته
ناس قالت انه غرق
في التل وبحيرته
وعليوه ياما دعا
ع الناس تحار حيرته

خايف عليوه الهوا
ينقل شرارة نار
وخياله كان الدوا
بيشاغله ليل ونهار

قال له الهوا عبيه
فوق الجبل فى اعشاش
لا النار تطول الهوا
واهو الهوا منحاش

شراره جت من فوق
ساب الهوا عشه
شالها وكله حروق
وبخها بوشه

كلت النار عشته
والناس ملحقتهاش
لعب الهوا لعبته
أصل الهوا بكاش
وانا ليه ست ستوت
حافضه المثل كله
وأى حد يفوت
توقفه تقول له:
” علي عليوه بنى
فوق الجبال اعشاش
قصده يحوش الهوا
هو الهوا بينحاش”