” حبكيات …( خُد دورك ) … ” للشاعر ” محمود الحبكي “

كُنت أركب أبويا حمار ب هزار
كان يكنس كل الدار
يلف يدور
و ساعات كنت أركبه بالمندار
ألخبط وشُّه
أشد شنابه
وأقوله شنابك زى الصرصار
بيشبِّك إيده ف إيدى
يآخدني معاه مشوار
كل عيال الشارع كانوا يخافوا
لو شافوا أبويا معاى
يدوني حاجاتهم
ويطبطبوا علي كتفي ويضحكوا بمرار
ولما يغيب
أقرض في ضوافرى تقولش فار
يتلَم عليّ دبان الشارع كُله
وأصغر عيِّل يضرب فيّا
ويآخد التار
بمجرد أبوى ما يهل
الكل فرار
وأموت بهزيمتي في حُضنه
كأن سكوتي حوار
وأبويا كِبِر
ولا عاد بيهمِّل دِكِّته ليل ونهار
ف عملت حمار
إركبني يا بوي
خُد دورك
قاعد تحتك
دوس علي روحي براحتك
شاور
قول
إختار
غطيته ونام
وأنا لسه في وضع حمار
مستني أبوي
يآخد دوره
مستني قرار