“برواز قديم” قصيدة للشاعر “جمال حراجي”

برواز قديم

برواز قديم مشروخ من النص تمام
وكأنه مفصود يتحايل ع الكراكيب
ويبص بنص عين ع الناس من حوالية
ويدخل فى الحوارات
ويحل مشاكل العيلة ببصة عين
من عشرين سنة
كان الضبط كده بنى أدم من دم ولحم
يقدر يشخط وينطر
تخاف منه البني أدمين
وتقف على فردة شنيه
نسور -غربان وحمام زاجل
من عشرين سنه بس
كان متربع على الكنبه الأسطنبولى
والمركونة دلوقتى جنب الحيط
بيدخن بشراهة
ويشرب 50 كوباية شاي مغلية بدون سكر
ويضحك من قلبه بجد
على أخر نكته
ماسمعش تفاصيلها كويس
ويعيط بحرقه على دم أصحابه
المسكوب على الضفة الثانية
ويحيد أفكاره
لما يناقش تفاصيل معاهدة “روجرز”
ويكلم عن أهداف الثورة
وعلاقة عامر بالنكسة
لما تعب من كل دة
قرر أن يغمض عنية ويقفل بقه
ويمدد على نفس الكنبه الاسطنبولى لوحده
وما يبقاش فاضل منه
غير برواز قديم
مشروخ من النص تمام