“أنا شكلى زهقتك غزل” قصيدة للشاعر “طارق العمري”

أنا شكلى زهقتك غزل

مع إنه والله العظيم مش باختيارى

قد كان وحصل اللى حصل وفشلت جد إزاى أدارى

بالقانى من غير أى قصد حروفى بتشاور عليكى وتوصفك

مع إن كل كلام باقوله حقيقى عاجز ينصفك

والبعد مهما شربت صبر يزيد فى نارى

يمكن مابينى وبين طوفان حبك فى قلبى باعترف

بجموح مشاعرى فى اتجاهك بس بارجع أختلف

ماهو صدق كل مشاعرى ليكى مش غلط

وباشوفنى مهما باقول فى حبك لازم ارجع م الألف

وأعيد وأكرر يمكن المعنى يطاوعنى

واوصل فى عشقك وابقى عاشق محترف

وارجع واكد ألف مرة وصدقى

تكرار محاولاتى ف كتابتى … مش قرارى

تلقائى قولى وعفوى حرفى لما يشتاقلك شغف

سامحينى يا أحلى البنات

العشق رزق من الإله وبأمره قلبى ويا قلبك .. يأتَلِف