“اعتذار” قصيدة للشاعرة “جيهان النجار”

انا آسف خذلتيني
يااا……. ناكرة
ميتي وطيني
رسمتك فى شراييني
حاصرتي حلمي فيكي حدود
وانا بالأسم والبصمة
وانا بالبخت والقسمة
هيورثني يادوب الدود

*وجودي اسم على ورقة….
وصفر بيحفظ الخانة
مافيش باقي ولامعانا
غير الموجود
بختم ازرق وخط احمر
وسنوات سود

*وحصة قوتي
في نهارك وأنهارك واصرارك
اعيش بركود

*انا هامش وع الهامش
ومش ….. نافش وبخزي العين من الخبية
وبعمل م الوجع هيبة واقول محسود
واستعذب من الوسواس
ولو أرفض ف يوم السجدة للخناس
ابات مطرود

*بختم الباطل المسنود
على عزوة
ولا تفتح عشاني حدود
واموت مقتول في ميت غزوة
انا نزوة ……
أنا نزوة ……
باموت مشدود علي الخذلان
وترسمني دموع فنان
بيلعن سطوة الهذيان
من الروعة
انااااااااااا
من قسوة اللوعة……… بقيت إنسان