الخبر الثقافي موقع يهتم بكافة النواحي الثقاقية بمختلف مجالاتها وتغطية الأخبار الفنية .
ماهو انتا برضو اللي غلطت
هو فيه في الدنيا بنّا.. يحط طوب
من غير ما يتأكد بأن الأرض دي
تكون حِمل مبنى..
او تكون حمل الضغوط؟
اصل انتا شايف الحياه من نظرتك
وبأن كل الناس قويه..
فا خسرت كل الناس فلحظه.. حتى هيّ
ماهو برضو كان صعب استيعاب..
ان انتا اصلا منقسم
بين شخص قاسي وصلب جدا
وشخص تاني كان ضحيه..
كل الطرق اللي قصادك صعبه جدا
مش كل حد قادر يكون جنبك رفيق
وانتا اللي لما تحب تمشي
بتمشي من أصعب طريق..
…..
فا كبرت فجأه..
وفجأه بقى صعب استيعابك
كل اللي اقسم انه يفضل
هو أول شخص سابك
او يمكن الرعشه في ايديك
خليتها مش متطمنه..
ماهو صعب تقنع ناس بنار
وهما ناس مش مؤمنه..
…..
الوهم أصعب صعب ممكن
وانتا كنت فيه غريق
كان كل لحظه بتبقى فيه
كنت تفقد م البريق
اللي محلي ضحكتَك..
…..
الجري للمجروح مضر
كنت عارف كل ده
فا انتا ليه كنت المُصر
تسيب وريدك
يروي في الرصفان بدم
كنت أولى انتا بيه
وكنت عشمان في الرصيف
بأنه لحظه هيشكرك..
ولكنه ساب دمك يدوسه كل شخص
…….
كنا أجمل..
لما كان الحلو كله من عنيكي
فاكره لما كانت الكبايه ليكي؟
لما كنت اديكي كل قطره فيها
فجأه سبتي والكوبايات ملهاش جناح
واهو كله راح.. واهو وقعت الكبايه
برضو اتكسرت..
ولما جيتي بعدها يوم تمسكيها..
مكانش فيه ولا قطره فيها
كل اللي فيها كام طرَف مليان سنون
لو حد قرّب تجرحه..
