“فنجان قهوة” قصيدة للشاعر ” متولي زيادة “

فنجان القهوه اللي في ايدك
بيصبح على عيدي وعيدك
وبيهمس بالشوق لشفايفك
وبيلمس لحظة تنهيدك
فنجان القهوه ده متكيف
ومظبط في الحب مشاعر
متسوي ع النار الهاديه
وبيشغل في اليوم ميت شاعر
مشتاق لشفايف بتحبه
وبتنقل شوقه المظبوط
ويقول في كلام مش متزيف
ولا ينقل في كلام مغلوط
ولا يعرف غير أن الهمسه
واللمسه الجايه اللي مابينهم
بتقرب مسافات وشطوط
فنجان القهوه ده مش عادي
دي قصيدة شعر بتتسطر
في قلوب الناس العشقانه
سهرانه في حضن الهمسات
وبتعرف توصف وتعبر
عن لحظه بدعها الفنان
من غير مايبالغ في المظهر
دي الهمسه اللي في احلى شفايف
هتنادي باسمك لو تقدر
فنجان القهوه مابيغشش
ولا يعرف غير وشك وش
وهيفضل مستني أوانه
ومكانه شفايف بتحبه
وتدور على سر مابينهم
وبيلمس قلب الفنجان
فنجان القهوه اللي في ايدك
ياحبيبتي اكيد كان إنسان