الخبر الثقافي موقع يهتم بكافة النواحي الثقاقية بمختلف مجالاتها وتغطية الأخبار الفنية .
الليل بيبقى طويل
ف الوحدة والعتمة
حتى النفس بيضيق ويحس بالكتمة
والغربة
كانت سبب للنفس تتأثر
لما المسافة تزيد
فى حاجات بتتكسر
وبتدبل الأحلام ولا ترضى تتفسر
الصبر
هد أمال ماعدش يجي ف بال العمر أى حياه
تاااايهة
يا خلق الله
مافيش هنا غيرى
أصرخ مافيش
غير اااه
بتهز تفكيرى
حتى العيال نايمين
راح اللى راح يا سنين
الحزن تحريرى
والباقى
كله كلام
أنا تهت ف الزحمة
سوق الحلاوة
جبر مافيش
غير تعاااابين
مش عارفة الاقى
منين
السم ف النظرات
كل العيون حشرات
بتغز وبتقرص
حتى حيطان
البيت
مابقتيش بتضلل
الهم متسلل من تحت عقب الباب
ياقلة الافراح
ف زمن مافيهش
حبيب
يا كترة الأوجاع
ف زمان مافيهش طبيب
ياااااا
صبر سيب
وأنا سيب
أنا سايبة تلقائى
مش عوزة منك يا زمان باقى
الدنيا بتنادى استحملي شوية
ما تشدى حيلك عشان الأجر ..ياغبية
أنا صااابرة ع المكتوب
من غير يمين ياوجع لاغلب أنا أيوب
بكرة يقول الناس أنا برضو ايوبة
واللى ما يشترى
ع الصبر يتفرج
بكرة يقول الألم
ويا الوجع اسفين
احنا دخلنا غلط
أو كنا بنهرج
أما عن الذكري
كاس الهوى مشروب
وف صحة الأيام
السكر مش مطلوب
على رأى أهل المثل
يا بخت من ف الهوى
قدر يبات مغلوب٠
