” مجرد تخيل ” قصيدة للشاعر ” جمال حراجي “

زى ما أتخيلت نفسك قدام الكاميرا
وبيسألوك عن مشروعك فى الأيام الجاية
ح تقولهم
إن بقيلك كام شهر
وتدخل الأربعين برجليك
وأنت لسه بتحلم بقصيدة جديدة
وبأرض جديدة
غير اللى أنت واقف عليها
دلوقتى
فيها أصحاب بجد
تقسم معاهم كل الأيام
الحلوة والمرة
وح تقولهم
انك متجوز
ودي قسيمة زواجك فى22-7
ودى صورة نادرة
ليك وأنت بتضحك
ودى كل القصايد اللى أنت كتبتها
وماحدش قراها
فاصل
والكاميرا ح تدور على وشك
وأنت بتنشف عرقك
وبتفكر إزاى ترتب
أفكارك لإستغلال
الوقت الباقي من البرنامج
للإعلان عن مشروعك الجديد
البنت اللى فى الإعلان
واللى ظهرت فى الفاصل من شوية
كانت صاحبتك
ونفذت كل نصايحك ليها
فبقت نجمه مشهورة
وأنت لسه بتفكر ح تقول أية
للناس عن مشروعك
أحسن أنك تنهى الحلقة
ببرقية شكر
للبنت اللى فى الإعلان
لأنها أوحتلك
بأن الأيام الجاية
مجرد تخيل
لمشروع جديد