” ممكن يحلم ” قصيدة للشاعر ” جمال حراجي “

كل ما يحاول يرسم
خطين للمستقبل
تيجى ريح برانية تضيعهم
ما كانش بيزهق خالص
يرسم تانى وتالت
لحد ما قلمه الرصاص انتهى عمره
نسى خطين المستقبل
وبقي يحلم بقلم رصاص
حديد ما حدش رسم بيه
قبل كده
كل الأقلام اللى أتوفرت له
في الوقت ده
كانت في أيدينا ناس تانيين
نصابين وتجار وفنانين
كان لازم يرفض شكله الأخير
وهو بيعدى العتبة الرابعة
من أيامه
كان لازم يعرف انه
ما فيش قلم رصاص حتى لو كان
عبقري
يقدر دلوقتى يرسم
“مستقبل ” مجهول
ما حدش يقدر يرسمه بجد
لكن ممكن يحلم بيه