الخبر الثقافي موقع يهتم بكافة النواحي الثقاقية بمختلف مجالاتها وتغطية الأخبار الفنية .
اقفل عنيا عليكي اتدفى
اقفل عليا عنيكي خوفي يروح
ياغربتي في الروح
وتر حزين بعدك في قلبه اتلمس
يادين شعور الغربة بعد الونس
وجع في روحه يروح ويجي خفيف
فرد الحمام اللي ضايع له وليف
“الليل وسماه”
تون نبرة صوت بياع الموت
في مترو حلوان
يا الغريب زيي
يا البنت البعيدة..
ورطتني عنيكي مع قطط الرصيف
فحكيت لهم إزاي وحشتيني
الغمازات..
اللي بتقع من ضحكتك كل مرة
تتحول بيوت
تساع كل العيال المحرومين
“الليل وسماه”
العنين في العنين
ويتلاشى من روحي خوفي الغبي
شفايفي تنز النصوص القديمة
شفايفك تجز ببراءة نبي
حاسس في صوتك نبرة استعداد
حاسس في صوتي حشرجة عصفور
الكبرياء..
مساحة الراحة لشفايفي
من حلمة الودن البراح
للكتف اللي نصه سحاب ونصه بحر
جبلين نبيت أبيض في وادي بعيد
براءة اختراع المشاعر الجديدة
لاتنين ملايكة اتقابلوا في ظروف سيئة
أيووووه
هينام إزاي دلوقتي وروحه بعيد
“الليل وسماه” في الراديو
بتحفر بير ملعون
مليان تفاصيل
رقص وفراشات
رعد ونوات
وحنين لغُنا
“وانت وانا”
