“تحت جلد القنطرة” للشاعر “محمد البيه” من ديوان “خمس رقصات في جنازتي”

الروح تلملم
م الحواري حسها
وترووح
خايفه من الضلمة ومن بكره
والسكة أوسع م النهار
تنهار
والعمر راحل
والرحيل…
شايل سنينه حِزَم
والقلب شابك نبضته
دق السكك فوق الجزم
والكوبري فوق ع القنطرة
ساكنة ضلوعه
بين حواشي الأرض كهل
والعنين
ابيَّض فيها المشي
زي الورق
قبل احتضاره بالكلام
…..
الكوبري شايل جوّه بطنه
ميت مليون عرق
ولا عمره بين الناس فَرَق

…..
تحت جلد القنطرة
مليون قتيل متوزعين
جوّه بطايق
محتاجة صورة
ومسخ نسر
واتنين بِدَل
مِتْفرغين م الجثث
والنور بلون الطين
وباين في الخِلَق
والوشوش التايهة
عدى جنبها
سبتمبر المخنوق بغز الأسئلة
دورت فيّا
تحت الهدوم/ الجلد
قمت وشفتني
زي الرصيف
والخَلْق قاعدة من صباحة ربنا

#ديوان_خمس_رقصات_في_جنازتي
*القنطرة ميدان وكوبري